قال من درب الهوى لاع قلبه وأهلكه
والسبب من صاحبٍ حاس واشغل مهتويه
مشغلٍ فكري,, وقلبي غرامه, يملكه
مالكٍ قلبي وبالهم دايم مبتليه
من غرامه خافقي كل شيء يربكه
أرتبك وأضيع لامن بغيت أفزع وأجيه
كل ما فكرت بالعقل قلت: ابتركه
ولا تدخل خافقي,, ردني غصب عليه
كل يوم بين قلبي وعقلي,, معركة
خافقي متولع به,, وعقلي ما يبيه!
والله إني داري,, ماورى الحب بركة
الهواوي فالهوى كل همٍ يحتريه
والهوى درب خطر واعنا من يسلكه
العنا والبهذلة والشقا منه وفيه
والهواوي يدري إن المحبة تنهكه
مير ما يهتم قلبه مثل قلب السفيه!!
