سراب وضحكةٍ صفرا,, بلا رحمة وامل كذاب
وأحاديثٍ تدوس من البياض اللون والمعنى
تزور عيوننا نفحة هنا,, وتموت عند الباب
وتذبح صادق النية وتسري في مواجعنا
نسد الدرب في وجه الظنون ونجرح البواب
ونمشي في طريق الصبح,, لين الليل يصفعنا
مجانين البياض قلوبنا تضحك ولا ترتاب
ولو شمس الهجير تذيب أملنا في مرابعنا
نفيض إخلاص نعطي من محبتنا بدون حساب
نحسب الناس,, كل الناس,, نسخة من طبايعنا
نرش الدرب للنشوان ولعينه نصير اهداب
ونبكي لا بكى المجروح,, حرّ بكاه يدفعنا
نحب النور لاجل النور لو نور النواظر ذاب
تحمّلنا عنانا لو غرقنا في مدامعنا
لنا في هامة العليا سكن,, ومن النهار ثياب
ولنا من نفحة الطيب الشذا,, والحق يقنعنا
نعيش أغراب بين الناس وإن متنا نموت أغراب
وتنسانا العيون اللي لاجل سلوانها ضعنا
غلط,, لكن وش الحيلة,, طبيعة والطبع غلاب
نتوب وننفض التوبة,, ونور الصدق يتبعنا
