أجلس واحب أجلس بمجلس هل الطيب
وإمجالس أهل الطيب عز ومعزه
فيهم حصانه عن أذروب العذاريب
وجنا بهم عمّا يشوبه إمنزه
وتلقا بهم خوه على الطول ماتخيب
بنيانها عج الدهر ما يهزه
أهل المروه مكملين المواجيب
وأهل الوفا الوافين في كل حزه
اللي يعزون الخوي والاصاحيب
وأهل هلا معها حفاوه وفزه
أنا مجرب والليالي تجاريب
وصحبة مثل ما قلت للراس عزه
أخير من ناسٍ إخباث الأساليب
اللي عن أهروج القفا ما تنزه
بين الخلايق يعلقون المشاهيب
والناس منهم دايمٍ مشمئزه
والرجل عن درب الردى له مجانيب
دربه على درب المراجل يقزه
يبعد عن الرديان ويخاوى الذيب
وكفخ أبرق الجنحان مايستفزه
