يا للي الى صادفتني تنشد تقول تروح وين
اخذ الجواب ان كان عندك شك يوم اتسالنا
حنا نسج ندور علوم الرجال الطيبين
ماهي طبايعنا جلوس بالبيوت الحالنا
ان ما نصونا اهل الوفا نعني لهم والله يعين
نعني وحنا يا وسيع المعرفة يعنالنا
يعني على ما قالت الامثال تندان وتدين
واللي يواصلنا على وصله نشد ارحالنا
عرف الوجيه الطيبة لاهل الوفا كنز ثمين
اللي منازلهم على القمة مثل منزالنا
اترك ضعوف بالبيوت اللي تسكر جالسين
لعل حال اللي مثل ذولاك ماهو حالنا
اللي على ما قيل لا دنيا ولا حفاظ دين
عنهم نقول من نشدنا قاطعين اوصالنا
اصحابنا دايم رجال المعرفة والغانمين
سلم لنا سابق عليه معلمين اعيالنا
فينا شموخ العز من طبع الجدود الاولين
نحشم بشيمتنا وقيمتنا ماهو باموالنا
من رافق الانذال طاح وكل ما يخفى يبين
الله يثبتنا على الحق ويزيد اعمالنا
والى توفانا عسانا من صفوف الصالحين
يا ساتر الاحوال يوم العرض تستر حالنا
