محاورة بين الشاعرين الكبيرين احمد الناصر الشايع والشاعر ابن تويم الدواي رحمه الله جرت في محافظة عنيزة:
أحمد:

يأهل الملعبة من شاف او جمعان ودي اخذ علوم الصاحب الغالي ودي ألعب واغني وادحر الشيطان والفلك يقتلب من حالي في حالي

سالم:

حاضر ويتوحى وسط هالديوان اسمعوا يوم راع الصنف نادلي كان ودك نسمح خاطر الديان خل معناك مع كلمتك يهيالي

احمد:

الليالي تصافق والقدح مليان والعرب هالسنة رجلي وخيالي انت رجل على الدنيا وسيع بطان واما انا بين هم وبين غربالي

سالم:

لا يجي من طرفنا مايل الميزان وان بغيت التعزوي شفت رجالي ما نوصف عليك ان الحصان حصان وحقنا ما يخلى للذي غالي

احمد:

انت ما نشتكي من يمك النقصان مير شيطان قلبي دوم يبرالي المغفل مغفل والذهان ذهان وكل رجل يسير بدبرة الوالي

سالم:

ما عليكم قصاره خابرك دلقان مير انا ما شحني من تعزوالي لا كتبت الرسالة وضح العنوان لو أنا قريت الخط يقرالي

أحمد:

يا حصان تغير بلا رسن وعنان في مغارك تبي الاول مع التالي ودي اجزاء هل الاحسان بالاحسان وتايه الدرب اباحطه على بالي

سالم:

يابو ناصر ترى ما كان خافي بان لا تحسب اننا بالعقل جهالي المعزة نبيها لو غلت بأثمان والخرابيط ما نبغي لها تالي

احمد:

الجنايز لها وسط القبول كفان سنة الله بخلقه مابها اشكالي كل تاجر يعرف الربح والخسران كيف أبابيع وأباشري على الخالي

سالم:

يوم أجيكم مسند من وطن هدلان راجين شربة قرطوع ازلالي وانت مااقول لك مقدي ولا غلطان أحكم الرأي للعسرات حلالي