الا واهني ياللي من الحب ما يهتم
يطيب الزمان أو يختلف شين ما همه
معافى زمانه لا يهوجس ولا يندم
يقضي ليال شباط والقيظ عند امه
وأنا اللي عيوني تزعج الدمع دمعة دم
واخفي جروح الروح والروح منسمه
سبب جاهل لا هوب يصخف ولا يرحم
لو اني من أقصى الناس ولا ولد عمه
حربني وانا مانيب طاغي ولا مجرم
أنا بالبخت يا هافي الوسط والذمه
الا يا مربي قذلة تقل ذيل أدهم
من العنبر الغالي على بعد له شمه
صويب المحبة لو نجح دور ما يسلم
يسومل على همه وهو ناشف دمه
ياليت الثريا ما اعترض دونها المرزم
لما الكبد يطفي حرها بارد الجمه
حرام الهوى غيرك من الناس ما يلزم
إلى صرت غيري ما تلد النظر يمه
