عيدت من قبلنا ذيك الفياض
واضحكت لعيون من جاها سعيد
من رياض في رياض في رياض
ما تشوف اللي مشى فيها وحيد
مع بروق الخير,, برق العيد فاض
وامطرت مزن المشاعر بالنشيد
واشرقت شمس السعادة بانتهاض
الطيور النايمة,, صبح جديد
واجتمع شمل المعاني في بياض
تحتفل عنوانها ذا اليوم عيد
في وطنها,, ما يكدرها اعتراض
يم أبو فيصل تهانيها تعيد
جت لابوها تعلن الحب الرياض
والوطن كله قريبه والبعيد
هيه,, يا من حبهم في القلب فاض
يوم ابي عيدي صداها ما يبيد
قلتها وقت مضى واليوم هاض
بي شعور خاطري به يستعيد
فرحة للطفل ما عنها استعاض
خافق لاجمل معانيها يريد
عيدنا ما فيه شك وافتراض
في السنة عيدين ما فيها مزيد
بشروا به في ميادين اعراض
جعله الله عايد بالخير عيد
