يقول منهو بدأ زينات الألحاني
غنى ونفسه مع العربان حريه
ماهوب لاجل الرجال فلان وافلاني
ولا لمحبة عنود الصيد ريميه
وان قلت زعلان والا قلت طرباني
نفس الشقاوي طوال الوقت مبليه
يا الله يا الله عن الزلات تحماني
لرحمتك نلتجي يا دافع السيه
أباوصي النفس ثم اوصي اخواني
بطاعة الله وحسن الظن والنيه
وطاعة الوالدين اللي لهم شاني
شان كبير ولهم حقوق شرعيه
الهم حقوق كبر حوران واباني
يا صعب توفاتهن ميه على ميه
الا على اللي بقلبه خوف وايماني
يوفي المطاليب هذيه وهذيه
يهين نفسه لهم في كل الاحياني
من بال صافي ومن نفس سموحيه
البذر محفوظ من قاصي ومن داني
والنفس للخير مامورة ومنهيه
هنيه اللي جزاه احسان باحساني
في ساعة ما بها روحه ولاجيه
