يا الله يامنشي حقوق المخايل
يا اللي جميع الخلق تعرف خفاها
ويا اللي جميع الناس تحتك ذلايل
ارحم عبيدك لاتخيب رجاها
بديت بالامثال طالب وسايل
والله عبيده مايضيع دعاها
الله كسانا بالنعم والفضايل
وبعض البشر ماتشكر اللي كساها
تقول قال فلان وفلان قايل
وتبذ خلق الله بكثرة غثاها
وماتكسب اهل الهرج كود الفشايل
وحساب ربي باقي في قفاها
واهل القلوب الميته والهبايل
لوعلمت ماهيب تعرف خطاها
واهل القلوب الحاقدات الغلايل
لو طبت فيها دايم ماقناها
واهل الردى ينسون كل الجمايل
واهل الوفا والطيب يظهر وفاها
والناس بالدنيا شعوب وقبايل
والفارق التقوى ولابه سواها
وياناس ياللي تفهمون المثايل
عندي نصيحه وافهموا محتواها
نصيحة لهل العقول الكمايل
هدية ماراد قلبي جزاها
رفيعة المضمون ماهي هزايل
ووصي بتقوى الله في مبتداها
وادوا الفروض وسارعوا للنفايل
ولاتتركون النفس تتبع هواها
ايضا ولاتمشون درب الرذايل
نفس تروم الشين لا واعناها
والصبر زين وقافيته الذبايل
كم صابر وثمار صبره جناها
وماصار بالدنيا فلابد زايل
ونفس الفتى لابد يدني فناها
وما ينفع إلا طيبات الفعايل
في يوم تلهي المرضعه عن ضناها
يوم تشوف الناس فيه الهوايل
وتنسا النفوس اصحابها واقرباها
وصلاة ربي عد عشب المسايل
على رسول الله في منتهاها
