يا صاحبي سهري على روس الاكواع
اخير من نوم وراه انفجاعه
في بحر حبك عكس الارياح منصاع
ما همني ضيق البحر واتساعه
خليت لك قلبي مجاديف وشراع
ما اخشى نزول البحر والا ارتفاعه
قلب عصى غيرك ولك صار مطواع
عن غيركم عنده حصون ومناعه
عشت بسمايه كيف انزلك للقاع
بدر طلع شتت ظلامي شعاعه
لا ضاع منا جوهر الحب لا ضاع
كيف اندبه وانت السبب في ضياعه
اصبر على لعبة خبيثين الاطباع
سود القلوب مفرقين الجماعه
كم واحد منهم غيور وطماع
لونه بجنه قال انا في مجاعه
ليا صبرنا نعيش وتزين الاوضاع
ونعوض الدهرين في ربع ساعه
