شايب وسني كبير وباح مكنوني
قربت تسعين عام وماشي فيها
والرجل ثقلت خطاها ما يشيلوني
والشوف بالعين راح وما يقديها
وعيالي اللي يجون ولا يمروني
هم ما دروا عن ليالي ذقت صاليها
وان جيت ابجلس مع اهل البيت كبوني
عشان سني كبير الله يجازيها
حتى الجماعة نسوني ما يزوروني
اللي منول على البيبان احييها
مدري علام العرب ما عاد يبغوني
اصبر واعذل على نفسي واسليها
وآخر كلامي تراني شاب واوحوني
شيابكم عز حاضرها وماضيها
وشبابكم فيه عزة نفس يا عيوني
لا شاف حرمه مع الشارع يباريها
وليا نصحته يشوفك شخص مجنوني
وصلاة ربي ينام ولا يصليها
والمعذرة يا شباب ولا تلوموني
من واقع التجربة شفنا بلاويها
