نجد دار العز دار الشيوخ اهل المقام
عزها الله ببوتركي وشعشع نورها
قبل يظهر شاربه في طلبها ماينام
حفيت خفوف الركايب وهو بظهورها
الرياض بخافقه واليمين بها الحسام
لين علا شانها واعتلا مقدورها
نجد لبست في مية عام ثوب الفين عام
فعل اهلها يسبق سنينها وشهورها
مملكتنا ماتحب الخلاخل والزمام
ذكر ابو تركي خلاخيلها وعطورها
مملكتنا ديرة الدين والبيت الحرام
وعز طيبة لااح بنخيلها وقصورها
وللحسا قصة رجال عجز عنها الكلام
للحسا قصة شجاعة ويشهد سورها
والجنوب وشامها غايب عنها الظلام
دام حنا لو يشين الزمن مذخورها
دارنا في واهج الحرب هي عز السلام
نجد شالتها شيوخ العرب بصدورها
دارنا في سيرة المجد راس السنام
ظلها ال سعود في يسرها وعسورها
دارنا لوتفتخر ببوتركي ماتلام
دام تحت الأرض شمسه تنير قبورها
