حي الخيال اللي يراود خيالي
يرقب عليه كل ما عسعس الليل
واجلس معه واحكي ظروفي لحالي
واعطيه عن قصة حياتي تفاصيل
خيال مخلوق على القلب غالي
يطيبلي معه السهر والتعاليل
في معزل من ضجة الناس خالي
مرتاح من دوشة هل القال والقيل
انظر يميني واتلفت شمالي
ما شوف غير السّبع السبع وسهيل
والارض مفروشة بقطن وزوالي
وكن السما ترسل مصابيح قنديل
واعطيه من ورد صعيب المنالي
من باقة ما تشرب الا من النيل
ونبدا حديث الود والبال سالي
باعذب اسلوب مايجي في تعليل
واليا بدا منه الحديث وحكالي
انصت لهرجه لا تراخى ولا ميل
ويهرج بعليا وابوزيد الهلالي
ويقول شافوا بالمحبة غرابيل
واليا انتهى هرجه بديت بمجالي
ولا جيب هرج يجرح النفس بالحيل
اقص له قصة غرام مثالي
ذياب والا عنترة مرعب الخيل
ويقول ليت يصير لليل تالي
والا يا ليت يصير ليل باثر ليل
انا معك تو المزاج استوالي
واحييت ليلي بالشعر والتماثيل
واقوله يفداك عمري ومالي
ما عاد باقي بالجسد عضو به حيل
اومر ومقدارك على الراس عالي
سمع وطاعة للرموش المضاليل
