بديت بسم اللي عطى وياخذ الروح
كل ماعليها قال له كن ويكون
يعلم عن النية له السر مفضوح
سبحانه اللي وحده يصرف الكون
بمحمد أنهاها وبدا بالنبي نوح
جيل يحل وجيل قبله يشدون
علم فجعنا بسود الأحزان مذبوح
لاعاد علم سيل الدمع بعيون
أسوأ خبر ذاعوه في صوت مبحوح
قالوا رحل فيصل بلاشك وظنون
فيصل من آل سعود له مجد وصروح
شبل الفهد عنه المخاليق يدرون
لو البكى في دين الاسلام مسموح
نواف كثر اللي على أبوك يبكون
لكم العزى يامير من قلب مجروح
أرثيه أنا وشاركت ناس يعزون
فيصل شبيه الشمس بالنور ووضوح
يامير لاتبكيه والموت مضمون
الموت درب للمخاليق مفتوح
كل يبي يمشيه لاشك وشلون
ومادام موت العبد حدد على اللوح
ياحظ ناس مثل فيصل يموتون
راع الكرم والبر والخير ممدوح
يبقى مع الحيين لو كان مدفون
كم خفف آلام وكم ضمد جروح
كم أعتق أرقاب وكم سدد ديون
وبالخير يسعى دوم ومنين ميروح
حتى آخر أيامه دفع كم مليون
من البر بأمه صار بالعود مطروح
فيصل عسى وامه بطوبى يحلون
باذن الولي فيصل له الذنب مدموح
بدعوات من له تالي الليل يدعون
