يا اللي تبي فوق الهوى تنصب اشراع
وايش لون لاصارت ارياحك قويه
ان كان مايبنى على ساسة القاع
والا اعتبر تفكيرك اكبر خطيه
يا ماضربت بوقتي اخماس وارباع
لين انكشف لي وجه هذا وذيه
خاويتهم طيبه على هم واوجاع
كثر الطعون الي بجوفي نديه
من غير مااعلنهاوهي فيني وساع
من غير ما ابديها على اهل الزرية
ماكنت افكر يوم تمسي بي انواع
واليوم صار الوقت يقسي عليه
هذي هي الدنيا تصاريف واوضاع
والله خلق نفسٍ لنفسٍ قديه
الله ولاحبٍ يجي غصب واصراع
بين النفوس ان كان ماهي وطيه
والحب ما الله جاعله عرضة اطماع
يا اهل القلوب الي تحب بهديه
اليوم صار الحب مثل التمتاع
مرحوم قيس وفتنة العامريه
ولاعاد تسوى كلمة الحب من طاع
شور الردي واللي شواره رديه
والله لو ما الله خلق لحظة اقناع
يمكن اموت ولا اقتنع بادميه
