نشرنا الاسبوع الماضي لغزاً كتبه الشاعر ناصر بن عبدالله العاصم وقد كان نصه

محبوبة ياكثر ناسٍ يحبونها تشغل وتزعل وترضي كل خلانها بس العجب ربعها دايم يطقونها ياكثر مايتعبون الحيل من شانها عنها انشد اهل الشعر واللي يعرفونها وارجي عسى الحل ياتينا على اوزانها

( وقد توصل للحل اصحاب المشاركات التالية )

يافكس حط الرسائل عند مامونها تراث الاجداد موردها وعنوانها اقرأ مدارات فحواها ومضمونها ماهمني لودفعت اثنين من شانها والله انا ما عرف (الكورة) وقانونها ايضا ولاجيت ملعبها وبيبانها والمعذرة ياجماهير تحبونها من خلقتي مامشت رجلي بميدانها

أزكى سلام وتحية حلو مضمونها لاهل الجزيرة شبابه هم وشيبانها حيث انها دايم تشدّ بفنونها وصحفة تراث الجزيرة اغلى مرجانها والغازها حلها سهلٍ وياهونها نحلها باسرع من اللمح باعيانها (والكورة) اللي علىالملعب يشوتونها هي اللي يشقى كثير الناس من شانها

***

سلامي عد ماهلت مزونها وعداد نجم في السماء زانها تنشد عن الكوره يازين قانونها فيها فريقين والحكم ميزانها انا شهد اني بالعشق مجنونها وانا اشهد اني واحد من خلانها

***

ياناشد اهل الشعر واللي يعرفونها خذ مني الحل ياناصر على اوزانها ماظنتي غير ب الكورة يسمونها كم واحد عطل اشغاله على شانها

***

مانسنس الشرق ومال الريح بغصونها حييت يامرجح الكفه بمزيانها دوك الرسالة ودوك اليوم مضمونها من هاجسٍ مايداني قول بهتانها ترى الملاعب لها ناسٍ يعزونها والكورة إن سانعت هي شف فرسانها

***

عندك يانصر سوالف ناس يبغونها واللي يزود غلاها طيبة الحانها ناس تجنب طريق وناس يلقونها واللي رغبها يخوض الوسط ميدانها الكورة اللي تذاكرها يقصونها نبغا تراث الجزيرة تنشر اوزانها

***

يالعاصم البنت عنا لو تخفونها ابخبرك باسمها واعطيك عنوانها الكورة اللي على الملعب يشوتونها والناس تصفق بياديها لفنانها

***

بلابل الدوح غنت اعذب لحونها والصقر يضحك على صيحات غربانها لو صار كوره وراكم ماتودونها الكوره اللي تهز شباك عدوانها الشاعر اللي بيوته ينشر فنونها يازين والله معانيها وقيفانها

***

يامسافر هالرسالة شعر مضمونها للعاصمة والجزيرة بان عنوانها عشرةهل الطيب والتقدير ماخونها مايطلبونه هلا من قلب والسانها محبوبة قلت ياناصر ايسمونها كرة قدم به فرح وايضا به احزانها لبعض النوادي مثل ليلى او مجنونها تلعب او تتعب او حظة عاثر خانها

***

كل المشاهير تطرب فن بفنونها وصقورنا الخضر جالت وسط ميدانها والهجمة اللي على المرمى يشنونها كورة مهاجم وصابت قلب نيشانها

***

يالعاصم اللي كتبت اللغز بفنونها خذ جاكم الحل عاجل لحظة اعلامها الحل معروف للي يفهم عيونها واللغز واضح علىماجا بميدانها الكورة اللي لها العشاق يذهونها وارجي عسى اللغز ياصلكم على اوزانها

***

المملكة عزها بناسٍ يحبونها حكامنا تسهر وتتعب علىشانها يا الله تعز آل سعود اللي حموا دونها حموا بحرها وسماها وكل جيلانها وشبابها بالملاعب تنثر افنونها تلعب كره راقية تلعب على اوزانها

***

هات القلم والبوك مع كربونها واكتب حلول اللغز مع عنوانها هاذي هي الكورة وابرق لونها بين الدول ترى عظيم شانها مقدودة كلٍ يصوع متونها ومعارك تجري على ميدانها

***

ياهل الهوى بالهوى قولوا لمفتونها يتعب على شانها في طرق بيبانها حتى الكفيفة تشوف النور بعيونها وتعانق المجد لاحلت بميدانها الكوره اللي ثبت بالكون قانونها عشق الملايين رجح كف ميزانها

***

للصفحة اللي هل المعروف يرعونها حطوا تراث الجزيرة رسم عنوانها قريت فيها بيوتٍ بان مضمونها ناصر كتبها واناحليت قيفانها (الكوره) اللي لها ناسٍ يريدونها وخضر الفنايل لهم ترقص بميدانها

***

محبوبتك يا ابن ناصر ما اكثر ازبونها كل الجماهير تعشقها وخلانها الكورة اللي كثير الناس لعيونها تسهر وتقطع مسافات على شانها رياضة للشباب اللي يحبونها واللي يبي صحته يلعب بميدانها

***

محبوبتك ياكثر من راح دونها وياما من الرجلين كسرت وذرعانها مجنونة بالجرايد دايم يسمونها ذي كورة قد بلي به شيب وشبانها وانا احمد الله مالي بها واشجونها حبيت انا اشارك بحلٍ علىاوزانها

***

رسالة بالجزيرة بان مضمونها يلوح مثل الصقيلة ورمزعنوانها الكورة اللي على المرى يحدونها ياكثر ما حمطروها بين بيبانها

***

عرفنا بيوت ابن عاصم ومضمونها وجتكم ردودي واضحة بين عنوانها هذي هي الكوره وصفها بجنونها يا ماتفرح ناس وناس تزيد احزانها

***

لغزك قريته بصفحة ناصع لونها ياناصر وهاك حل مطابق اوزانها الكوره تلم صاحيها ومجنونها بالمستطيل الخضر يسعى على شانها

***

هذي هي الكورة اللي هم يحبونها شبابها انفتن فيها وشيبانها خلوا التعصب هلا ياللي تعشقونها لاجل العلاقات ماتصدع اركانها ولاتضيعون الوقت وانتم تشوفونها ثم تهملون اللي اهم منها على شانها

***

صفحة تراث الجزيرة كنز مضمونها فيها القصص والحكم وتشوق الحانها نشكر جهود المحرر شيد ركونها واللي يشارك ومن يكتب على شانها ان كان (للكورة) اشخاصٍ يعشقونها للشعر عشاق والصحفة وعنوانها

***

الله من كثر ناس يشوفونها خلوا اشغالهم كله على شانها تراه الكورة ياللي ماتعرفونها معشوقة للناس حضره وبدوانها

*****

محبوبتك عارف سره ومكنونها عبر الجزيرة يجي حله وتبيانها الكوره اللي لها ربع يحبونها ياكثر ماشقيت العالم على شانها

***

سلامي ياصلك ياناصر على وزونها وللغز حله رسلته يم عنوانها ومحبوبتك ياكثر من هم يعشقونها وعشاقها اطفال وشباناً وشيبانها وحله ترى الكوره اللي هم يشوتونها وكل يبي يدخل الكوره في بيبانها

***

قريت الجريدة وانا من اللي يقرونها احب صفحاتها واحب بيبانها وللغز حله واضح في مضمونها ومقصدي تراه كوره مع ورعانها

***

ياللي كتبت الرسالة بان مضمونها عرفت مضمونها من رمز عنوانها اللغز حله ترى الكورة ومادونها مجنونها اللاعب اللي دوم كسبانها لكل كورة حكم يعرف بقانونها يعرف بقانونها في وسط ميدانها وختامها ماعليكم غير تقرونها تقرون ردي ويعلن موعد اعلانها

***

يا للي زهمت السدود وباح مكنونها حييت ماهل وامطر ناشي امزانها اعرف نبا البنت واعرف من يعشقونها وبالدر سعي (مابل) اسم البنت وعنوانها ولي صاحبٍ بارع ياخوك بفنونها يشهد له الخصم لامن دش ميدانها لاصال بالملعبه خصمه غدى دونها والعام الاول تركها واعتزل شانها اليوم باشر مع ارجال يديرونها يالله عسى الفال له تحقيق كيسانها

***
توضيح,.
الاخوة الاعزاء المشاركين في حلول لغز الاسبوع,, نرجو الالتزام ببحر اللغز وقافيته,, لان هناك العديد من الحلول الصحيحه استبعدت لهذا السبب,, مع الاهتمام بوضوح الخط ,, ويا هلا بكل المشاركين,, وسيكون آخر يوم لتلقي الاجابات مساء يوم الاثنين.