قالوا تحب وقلت بالحب تعذيب
كم جمرة بالقلب زود لهبها
كم واحد اضحى قتيل المهاديب
العين تذبح والبلا من هدبها
لا صرت ما تعرف اسلوم الرعابيب
جنب عن ادروب عسير نشبها
لو ابدعن بالقول مالك مقاضيب
تفنى حياتك ساعين في عطبها
وتروح بالتفكير سجات وتغيب
ويموت قلبك ما تحمّل غضبها
وتبقى رهين لشارته والمطاليب
لو يطلبك هالروح ترخص طلبها
ولا تهتني بالنوم غفوات ما يطيب
وكل الهموم لساحتك تنتدبها
اسأل وتلقى بالقصص والتجاريب
تغنيك عن دنيا الغرام وعجبها
ولا شك بعض الحب للنفس تهذيب
تبذل سخى والحال زادت ادبها
هذي حياة الحب رغبة وترهيب
كسبان ياللي سالي ما قربها
