لا نويت أنساك صرت اذكرك وأنسى مانويته

صار نسيانك صعب والسهل نسيان النوايا

عاشقٍ ما تعرفه كيف ابتلابك وابتليته

يمكن انك ساحر الحب الخفي,, خلف المرايا

كان معجبك القصيد اشكرك واعجابك قريته

وكان عاشق عشق ماله لا وصوف ولا حلايا

عد في رجم الهوى وازهم هواك اللي هويته

وانتبه لا تنكشف للي نواياهم دنايا

اكثر العشاق من لا يعرفه يسمع بصيته

قبل لا يحكون عنه اللي يحثون المطايا

يعلم الله ما انشغل فكري بشخص الالقيته

هاجسي ينساق لي سوق النشاما للحمايا

وان عشقت العشق وقفته على سيسان بيته

وابتديت ابنيه من كيفي تحت عوج الحنايا

لين يمشيلي على طوعي وظنٍ به هقيته

ما يعرضني هل المنقود وسهوم المنايا

ان مشى حبي على كيفي ملكته واحتويته

واكتفيت ولا شعاني حب غضات الصبايا

وان عصاني: قلت حب ما يطاوعني عصيته

يعتبر عندي عطا قوم يمنّون العطايا

الغرام اللي بدون اثبات من قلبي محيته

احرقه لا عاد يبقى له على الدنيا بقايا

يا مغفّل لا تعاتبني على ذنبٍ جنيته

انت هذا الذنب ذنبك والله اعلم بالخفايا

ان بغيت اتقر في ذنبك هذا والا نفيته

كل حبك ما بقى له جزء ذره في الخلايا

اعرف ان الماء يدينك ما تحوقه لاكفيته

كان تدري,, ويش تعي جدَّ,, من ضحك الثنايا