محتاج انا للفرح والضحك يابنتي
تعبت اعاني عذاب دايم الطاري
ظلما حياتي تراها ونورها انتي
شمعة تنور بعمري مظلم اسفاري
كانت حياتي مآسي لين ما بنتي
فرحة لقلب على حزن الزمن ضاري
عشتي بقلبٍ شقيٍ حيل واسكنتي
في داخلي فرحتي وايقظتي افكاري
صرتي ونيسة طويل اللي لي عنتي
على صدوف الزمان ولعبة اقداري
في داخلي كل ما عانيت هونتي
ضحكة اشفاهك بقلبي مطفية ناري
جيتي وعمري فرح واشواق عنونتي
في جيتك هاجسي عن خاطري ساري
جيتي وليالي حياتي السود زينتي
جيتي وسترتي عذاب ما انستر عاري
جيتي فرح في خفوق فيه دونتي
اجمل معاني تلاشت به وانا داري
وما عدت محتاج غير رضاك يا بنتي
يا ساترة في عيوني همي العاري
