انا البارح سهرت الليل كله
وراسي مأهتنى فوق الوسادة
انا بعض البشر يثر عليه
وانا التعبان وهمومي جلادة
يقولو ان الهوى يذبح رفيقه
وانا اقول البشر فيهم قراده
واقول ان الهوى بالعصر الاول
اليا هالوقت مانزل شداده
واقول من الهوى مات الدجيما
وابن لعبون قاسى لين اباده
واقول من الهوى محسن تغربل
وكم من واحد فارق بلاده
وعذّب قبلنا خطلان الايدي
اقول اسأل وانا اعطيك الافاده
لو ان الناس تترك كل عاشق
يحقق مطلبه ياخذ مراده
لعاش اهل الهوى بأمن وسلامه
وكل بالهوى يجني حصاده
الا يا هل الهوى خل المهاوي
تراه ادناه ما يجرح فؤاده
انا لي صاحب ما شفت مثله
بوسط القلب سجل له شهاده
اذا شفته فقدت انا شعوري
ادوس النار واحسبها رماده
الا يا عين حرٍ صوتوا له
عثى بالجول في هاك الحماده
مخاليبه تصيد اللي تنوشه
ويطرب من يهده في هداده
وجبينه لا بغيت آصف جبينه
عبيرالصبح يجلالك سواده
والا يا عود ريحان تثني
نعم له في غروس وفي سعاده
تهزع مثل قواد السرايا
زعيم عارف فن القياده
حبيبي لا ذكرتك زاد همي
حبيبي يا منى قلبي وزاده
نبي نبعد عن اللي عذبونا
عن اللي هرجهم بالناس عاده
نبي نبني الخيام بوسط فيضه
ما دام العمر ما قرب نفاده
ابيك اقرب من عيونٍ تخيلك
واصير اقرب لك انت من القلاده