الى صد الرفيق اللي تعزه

وبان ابه الجفى عقب المغزه

وغير طبعه المعتاد واقفى

بلا ذنب حصل منك استفزه

ابخل الحلم الحكمة شعارك

وحدد علته واعرف مغزه

ومن عاتب رفيقه عند زله

يخليه الزمان وخاب عزه

رفيقك لابغيته عند شده

لقيته يقطع الصعب ويحزه

يشاطرك الهموم ان ضاق بالك

ويبرك للحمول ابكل حزه

رفيق الضيق مرفوع مقامه

عزيز جانبه عزك ابعزه

فلا يجرح شعوره منك كلمه

وعن درب الدنس لازم ينزه

ترى هذا ومثله راس مالك

له الراية على العالي نغزه

ولابه خير في خل مذبذب

الى ما وصلته كلمه تهزه

هبوب الريح به تقفي وتقبل

شياطن البشر يملك توزه

ولو انك سعيت بكل جهدك

تحاول بين خلق الله ترزه

يصايد زلتك في كل غره

فلابه خير عزه مثل هزه

يضيع الطيب والمعروف عنده

ونفسه منك دايم مشمئزه

ولا تحرص على راع المصالح

رفيق المصلحة بالعين خزه

الى منه قضى اللازم تنحى

ولو الموت بيده لك يدزه

عديم الذات ما عنده مروه

لعل الله عن العالم يجزه

وخلان الرخاء ما اكثر عددهم

والى جت حزته ما منه فزه

الى منك بغيته صد واقفى

تقول انك على الغارب تطزه

تخير بالرفاقه كل صالح

وفرخ الحر ما هو فرخ وزه

واختم القول خل الحلم طبعك

الى صد الرفيق اللي تعزه