أصحى على صوت الالم وانتهض هم
ويشيلني في كل الاحوال همي
اخالف اعراف العرب واقصر الكم
واكون احلامي على طول كمي
اعزف معاناتي على صهوة اليم
يمكن يجي صوتي على لحن يمي
احس عيني تنثر احزانها دم
واثري غلاته في شرايين دمي
طلبت قلبي,, قلت يا صاحبي سم
لاجل المعاني تكتمل قلت سمي
شربت انا فرقاك كاسات من سم
واخفيت صرخات الالم وسط فمي
والله ما ظني بك الشمل يلتم
لو كان تدفعك المقادير يمي
يا حملي اللي مر عيني ولا تم
ما ابغاك في آخر حياتي تتمي
كم راح من عمري واللي بقى كم
كل القلوب تخون بي بس امي
