بين الشاعر صياف الحربي ومطلق الثبيتي

صياف:

يا سلام الله ودار العز مرفوعٍ علمها

عقب شعشع نورها والظلم حال العدل دونه

الثبيتي لو أقول اقسم عيونك ما قسمها

والتفت فيّه بنظرة حسد ويطيّر عيونه

الثبيتي:

يحفظ الله الجزيره والشجاع اللي حكمها

مثل قصرٍ ثابت السيسان واخوانه حصونه

صاحبي صياف ينهبها وياكلها بدمها

ليتها ما تاصل الحنجور تنشب في سنونه

صياف:

المطيّه ما تقاود غير مع رجلٍ خطمها

لو يضيع اخطامها من طردها كثرة غبونه

انت اشوفك تفرس الصيده وتشوي من لحمها

والخوي لا ضيّع القانون قاموا يشتمونه

الثبيتي:

المطيّه خلّها فالدرب لا تكتم نسمها

واحترس من غضبة الجمّال لا يخبطك شونه

كل حيّه سمّها في بطنها سدّيت فمها

وان لقيت الوعل أبوقرنين اطقّه في قرونه

صياف

أكثر العربان يلزمها وكنّه ما لزمها

ثم راح من الزعل يمشي ويقطع من ردونه

انت مثل العقرب اللي تخلع الناس ابوحمها

مار جاها قاريٍ شاطر دهنها من دهونه

الثبيتي:

ما عليّه من عجوزك كان ما ضوّت غنمها

وان زعل صياف جعل اللي وراه يحول دونه

أمس يبني عشته فالضلع واليوم يهدمها

والهبايب ما تهبّه والطراقي ما يجونه

صياف:

الله إنه ينصر السنه ويظلم من ظلمها

والعرب ما يطحنون الحب لين ايفتّشونه

لو تشوف العشَّه اللي صاحب الخبره حزمها

فوق ضلعٍ كل ما طاح المطر تثمر غصونه

الثبيتي:

الإشارة فآخر الشارع بصدّامه صدمها

بالونيت اللي قديم وكل يوم يوظّبونه

المنايا يا وسيع العرف ما يخطي سهمها

مار خلّك صالح النيّه وعمّك لا تخونه

صياف:

القلوب العمي خل الذيب ياكل من شحمها

والونيت اللي يسوقه صاحبه لا تقربونه

ليت بقعاء تلمس الرمضا وتاكل من قدمها

وانت يابو راس رأسك ما تغيّر عن متونه

الثبيتي:

العيون اللي تهل ادموعها منهو لطمها

لو عرفته كان خلّيت الجماعه يحبسونه

المطيّه يوم ريّض مشيها ما احدٍ نهمها

لو نهمها كان تاصل مطرحٍ ما تاصلونه