سعود الايداء ريف ضيفه وجاره
مرثيتان في الشيخ سعود بن محمد الفرحان الايداء شيخ شمل قبايل ولد علي من عنزه، وأمير الفوج الثامن والثلاثين بالحرس الوطني الذي وافاه الأجل بألمانيا يوم الاثنين 6-2-1435هـ تغمده الله بواسع رحمته ومغفرته.
الموت حق وكلنا بانتظاره
عسى مجيّه عند حسن الخواتيم
لا شك موت الشيخ والله خساره
مثل أبو مشعل والشيوخ المقاديم
اللي بهم للناس نفع وقاره
أهل المروّه مكملين الملازيم
مرحوم يا شيخٍ بعيده أذكاره
سعود جعله بالجنان النواعيم
شيخٍ ولد شيخٍ وساس الأماره
ما شيخته شيخة تجاره وتعليم
سعود الايداء ريف ضيفه وجاره
يفرح ليا كثروا عليه المعازيم
اللي عن الزوّار ما صك داره
ياما عطى وضحا وشعل ومجاهيم
يعطي لمن جاله أصايل امهاره
والمال عنده ما يعادل بمليم
طيبٍ مورث ما خذوه استعاره
أسرة كرم في حاضر الوقت وقديم
وكم من أرقابٍ مصدرينا قراره
عطيت لخو بقشة اضيافة وتكريم
وقف مع الويلان وقفت جداره
حتى خذوا حقوقهم المحاشيم
ولو هو خساره قلت ما به خساره
ما دام باقين الشيوخ الشغاميم
اخوانه الوافين مثل النماره
وعياله اللي للمراجل مزاهيم
هم العوض والعز قايم اجداره
محكمٍ ومثبتٍ بالمراسيم
وصلاة ربي عد وابل أمطاره
منا على محمد صلاةٍ وتسليم
- الشاعر/ عبيد بن كريم الجريدي العنزي
**
كل العيون بنونها صورة سعود
هذا الذي يا عيال وايل فقيده
على المراجل حط له كف وزنود
يتعب عليها والمفاخر وكيده
فعله لحاله زود وينومس بزود
طولات عز المرجله هو رصيده
على المعالي بيرقه دايم سنود
عقله تميّز يا العقول الرشيده
كل العزى وسعود ما زال موجود
متوارثين المجد كل البديده
شيخ لبني عناز والوصل ممدود
طيبه توارث من حفيد لحفيده
بالخير له مجهود حنّا له شهود
مجد الجدود الأولة يستعيده
حب البلاد وعنده الطيب معقود
جعله على الجنة وروحه سعيده
الشاعر والإعلامي/ محمد العريعر - الرياض
