متن السحاب
با الهون يا الهاجس اللي نشت متن السحاب
احذر من الغيمة اللي ما بعد نشتها
الغيمة اللي بها البارق يشق الضباب
ان حاشتك مشكلة والا بعد حشتها
ما عاد يمديك تنزح من محيط العذاب
لو كل الارقام حطمته وفلشتها
راحت معاك الظنون وعودت با الجواب
استرسلت يوم ردت لي وناقشتها
زعلتني، ليش تفتح لي من الهم باب
جاذبت فوق لسماك الروح واربشتها
واقف على منكب البيدا واسجل خطاب
واقسى الظروف بهذاك الوقت عايشتها
يا كن الافكار من عندي تحث الركاب
هي, طفشتني وانا, بالحيل طفشتها
وياكن بالصدر شلفا لابن غانم ذياب
لو تنتهاوش برفع الصوت هاوشتها
لو كان قلبي من الفولاذ يمديه ذاب
من خربشات ٍبنار الهجس خربشتها
الله يجازيه ودا والتفت لي وجاب
يا لين حتى جروح الروح نبشتها
يا وقت جرحك نزف والله يعين المصاب
والحال جوعتها والنفس عطشتها
لكنّ ماهو بنا اللي يعلن الإنسحاب
والدعوة اللي تودي خلف طنشتها
الصبر بالخرج يملاه وشموخي زهاب
والذلّة بخانة التهميش همشتها
بين الزعل والرضا في خافقي والعتاب
وطروش ردت علي وطروش طرشتها
ومن الضما ما رويت ولا طردت السراب
واللعبة اللي تغث البال كوشتها
خليت صفحة كتاب وشلت صفحة كتاب
من بعد ما شفتها كله وفتشتها
- مرزوق الرمالي
