يا الادمي كّر وبرّق بدنياك

دنياك هاذي بين موجب وسالب

يوم تنكّر لك ويوم تبنّاك

واحيان به مغلوب واحيان غالب

ونوبٍ معك تمشي ونوبٍ تقفاك

ويرسب بها طالب ويجتاز طالب

ان اقبلت تعطيك كان الله اعطاك

يعني معك تنصاع قلبٍ وقالب

تقوم عندك تبترم ما تعدّاك

مثل المسوح ليا مسحته تحالب

وان دبّرت حوّل وعقّل مطاياك

حتى لو انك تغلبيّ التغالب

تقصر رشاك اللي تمده على ماك

عن منهلٍ ماكدّرته الدغالب

ولو تحترص منّا ومنّا ومنّاك

لازم تسوي فيك بعض المقالب

ويمكن تشاهد منظرٍ صعب الادراك

وترقص على موت الأسود الثعالب

وان حدّتك سود الليالي على اقصاك

وامست عليك هموم بقعاء تكالب

على الله الله ثم على فعل يمناك

والحر ما يفرس بليا مخالب

والرزق عند الله وما يقسمه جاك

قد السبب بالسوق شاري وجالب

هاذي هي الدنيا كذا لا عدمناك

حنا نطالب والزمن له مطالب