مرثية في صاحب السمو الملكي الأمير بدر بن عبدالعزيز -رحمه الله-:

دمعة على خد الوطن سالت، ولاهو من قليل ..

وفراق روح قلوبنا، ياهو وجع، يابو فهد

ودّعت، وعلومك حروفٍ من ذهب من لا مثيل

وكل المدى يشهد لشمسك يا بدر، والله شهد

الدار ما تنسى الأصيل اللي تناسى المستحيل

اللي بناها مع بناة الخير، بزنود وجَهَد

والنار ما تنسى الكريم اللي ضوا لابن السبيل

واللي فزع، واللي دفع ياما عن نفوس النكد

قالوا رحل، قلت التماهي للعلا ما هو رحيل

ولا يرحل اللي غارسٍ لهْ في فيافينا وتد

ابن السمو وللسمو، الطيب والفعل الجميل

والمرجلة، والهيبة اللي ألف روحٍ في جسد

إبن السمو وللسمو، ولا تميلي يا النخيل

هذا شموخٍ ما يغيب، ولا يواريه اللحد

أموت ما أنسى ضحكته، روحه، وتاريخٍ طويل

وكفٍّ لمست عروقها، وطيّبت منها كل يَد

إنسان غير، إنسان لكن .. له ميادين وصهيل

يتعب مدادي لو يبي يلحق مشاويره عدد

يا الله، يا الرحمن، ياذا العفو يا الرب الجليل

تغفر لعبدك، ترفعه، تغسلْه بالما والبرد

وتسقيه من حوض النبي كوثر زلال وسلسبيل

وتجزيه من خيرك، وتقبل دعوتي، وانت الصمد

والله يعظّم أجرنا، وأجر الدموع اللي تسيل

ويصبر أحبابك على ما صابهم يا بوفهد