لو نهل الدمع مره وألف مره
في صميم القلب يبقى له غزاره
واثق حروفي على إحساسي تشره
ما بقلبي فوق توصيف العباره
الفراق صعيب والدنيا مغره
لكن المكتوب ما لك عن مساره
روح الطيّب وغدا بالكبد حره
يوم تركي راح في طالع نهاره
وزملانا منه دايم في مسره
وذكره الطيب ملا كل الوزاره
ما حصل لانسان من شخصه مضره
والتواضع والوفاء دايم شعاره
عند شهر الصوم يسعى بالمبره
للضعوف اللي شكوا ضيق ومراره
في يمينه تلمح نجوم المجره
نسل ابوه اللي على العليا مناره
اشهد انه عام خيره وكاف شره
نطلب الله يجعل الجنات داره
- شعر/ سعد الخريجي
