راكب اللي يوم تضرب بالتواير
كنها ترسم لها خطوط غزيره
تلها المطنوخ ما عود يخاير
تلة اللي ما عليه من الكسيره
من ورى لندن قبل ساعات طاير
للديار اللي لها قدر وبريره
وصل المكتوب والخفاق زاير
للمليك اللي حكم شبه الجزيره
صح ما تدري عن اللي في السراير
ولا يعرفه غير خلاق السريره
مير والله يا لك في وسط الضماير
منزله ينطق بها شعبك كبيره
دم شعبك في تحري العلم فاير
يطلبون لك السلامه والستيره
كلبوهم يدفعون أغلا البشاير
يوم قالوا عدت الدعوى الخطيره
والغريب اللي من الأشواق حاير
صارت الأشواق في عينه صغيره
انت أبونا وانت واخوانك ذخاير
للشريعة سيف ولدنياك سيره
- عماد بن عجيان العتيبي
