يا معين أعن من بات يرعى السواري
الناس في راحة وعينه سهيره
ليا غفا دكت عليه الهذاري
توارده من كل فجٍ مغيره
يالله يامذري هبوب الذواري
ماغيرك أحدٍ يطلع بالسريره
قامت تشاعفني هموم وطواري
مع كل دالوبٍ تجيني عويره
همٍ مزايمني وهمٍ مباري
وبحلت بين الوارده والصديره
كن الفؤاد مشلقٍ بالشباري
والعين تذرف بالدموع الغزيره
شيٍ جرا لي قد وطى ناس غاري
مانيب الأول مع توالي الجريره
جرحي مخاوي معي من عام ضاري
لو رحت للدكتور ماشوف خيره
ولو يجتهد والا يجيب استشاري
يحتار به لو جاب من بالجزيره
لكنها في جال مغنا الوقاري
منجي غريقٍ في بحورٍ غزيره
اللي فرج لأيوب عقب العزاري
وشفى عقب ما كان حاله ضريره
أرفع يديني بالغسق والغداري
وأقول ياجابر عظام الكسيره
يا مجري الما في عروق الشجاري
يا رازق الداب العمى في حجيره
عونك ولافزعة ردي الشواري
لا تجعل الطرقة علينا عسيرة
- ذيب بن متعب البراق
