الله من قلب هجوسه تمله

مل الغضا لمبهرات المباهير

وشوف البراري والفضا ولعة له

لا شفت بالمنشا مزون مزابير

يا موتري ريحتك القيض كله

أبيك لاقامت تطول المشاوير

لا بد لك لابرّد الوقت تله

يحن ماطورك على ساقة الطير

في ماقعِِ بعض العرب ما يدله

مدهل لفتخان الرجال المناعير

نبي لنا معهم وناسة وفلة

مع درب مسهاج الوسوم المباكير

ليا اصبحت روس النوازي مطلة

عقب الجليد نكّسر الثلج تكسير

ثم أصبح القرناس من عقب طله

يوجس بجلده مثل دق المسامير

واستطلعوا خطو أشقر عادة له

حرش الكفوف يمزّر الخرب تمزير

والبارحة حل المسا قد حصل له

عشا خفيف من ابرق الريش تنسير

لافرعوه وشافهن وادرجن له

وأدلج وراع الجمس كفه علي القير

وتضايقن عقب الفضا وأحضرن له

وسلط علي وحده وذلّكّ مخامير

وليا المشبب عندهم مزهب له

باللي ندبها طيّر الريش تطيير

والخرب طقه ما تعدى محله

والثالثة فرّت ولاعينت خير

بطيارها شفنا غيارة وخلة

زمّت وحوّلها ولي المقادير

أعلق بها اللي عوقهن سهمة له

شيهان عوق ملوعات المعاشير

ملموم مثل الصول طوله بجله

أجرد يصخّر شرد البرق تصخير

وكل ركض للي بوجهه يشله

تزارقوهن بالحدود البواتير

أكبودهم عقب القرايا مغلة

تسع الشهور نقزر الوقت تقزير

وركبوا وقالوا تبّع الجمس ظله

لاما نقول أوقف كفيت العواثير

نبى لنا خد مهامل امزله

ما دوجت فيها الغنم والمظاهير

تلقى بها زرق المعارف محله

بيض الدواغر متعبات المداوير

هذا هوى اللي قزّر القيض كله

ما شاف غير القوبعة والعصافير

بدر الحويفي