شوي لا من قلت بالحيل مشتاق

لأني بعد فرقاك كتلة من الشوق

يا شينها لو يجتمع حب وفراق

تعيش وضعٍ ما تمنّاه مخلوق

تحبّ وتعاني الألم وسط الأعماق

ودّك تنادي لكن الصوت مخنوق

قلبك يبي من ليل الأحزان الإشراق

والوقت يمشي بك ولا حولك شروق

تقبل عليك أشواق وتودّع أشواق

يعني ما يمدي يضبط الجوّ وتروق

ومحدٍ نشد عن صدر الأشواق لا ضاق

والا الخفوق اللي من البعد محروق

يا صاحبي شفني على الوصل توّاق

وأبيك مثلي تطلب الوصل وتّوق

مثلك يدرِّس فنّ (مفهوم الأذواق)

وبعدك عن المشتاق ما هو من الذوق

مثلي ما هو دكتور في كشف الأوراق

حتى لو أنّ القلب بيديك مسروق

الحب ميثاقه ما هوب أي ميثاق

وثوب الغلا ما هوب معروض في السوق

أنا بعد فرقاك مليون مشتاق

وودي تكون الحين ميت من الشوق