قصيدة رثاء في الفقيد الغالي

يوسف بن محمد العقيل رحمه الله

يوم الخميس الصبح جتني رساله

لا عاد ذاك اليوم واللي حصل فيه

باخر شهر (10) بغيبة هلاله

الموت غيب من نحبه ونغليه

العين جزعه والمشاعر بحاله

والقلب يا كن المسامير تكويه

على رفيقٍ راح والموت شاله

ما عاد شيٍّ في يدينا نسويه

لا شك ما قدر على العبد جاله

وما قدره رب السموات راضيه

الموت حق وكل حيٍّ يناله

مهما يطول الوقت لا بد ياتيه

يوسف ويوسف عنه ما نيب داله

لو طالت الايام ما نيب ناسيه

لا يا مل الجنه رفيقٍ لحاله

والنعم يا كثره الى حل طاريه

ياكل حلال وماكله من حلاله

والفرض ما خلاه دايم يصليه

وابوه ما عمره شكا من فعاله

طيبٍ يصبح به وطيبٍ يمسيه

والله يبيحه فوق طيبه جزاله

هذاك يفزع له وهذاك يعطيه

والى زعل واحد وبان الجفا له

يروح لو ما اخطا على شان يرضيه

ولا العزا كلٍّ يحق العزا له

في موت يوسف كل واحد نعزيه

أعزّي الوالد على ما جراله

واعزّي نفسي فيه وانعاه وارثيه

واعزي اخوانه واعزي اعياله

واعزي اللي مقدر اصل واعزيه

واعزي اعمامه واعزي خواله

واعزي اصحابه واعزي بني خيه

وحقه علينا نكثر امن الدعا له

ما خاب من يرفع يدينه لواليه

نطلبك ياللي مالخلقه بداله

ما غيرك اللي نلتجي له وندعيه

فردٍ صمد متوحدٍ بالجلاله

سبحانه اللي كل مخلوق يرجيه

انك تعلي منزلته ومآله

وتمحي له السيه وتكثر حسانيه

وتثبته بالقبر حزة سؤاله

وتغفر ذنوبه يا الهي وتنجيه

وتجعل مقره جنتك بارتحاله

امين ثم امين من قلب مغليه

وصلوا على اللي خصنا بالرساله

امحمد المبعوث من عند واليه