يالله طلبتك تديم الستر يا والي

يا للي عليك الصعب سهلة وميسوره

اليك نلجأ بوادي الأمر والتالي

واليك رجوى قلوبٍ فيك مأسوره

من بعدها يا بلادٍ قدرها عالي

دمتي بأمان الولي ورضاه منصوره

يا قبلة اللي لربه متجه سالي

يا محكمة هالكتاب وفيك دستوره

اجيال راحت وتاتي بعده اجيالي

وانتي لهم درةٍ في القلب مستوره

نرخص لك اللي لغيرك قيمته غالي

ونبيع خاين يبث السم وشروره

ونكون لك في وجيه النذل غربالي

سمه بدمه ومثله عيشته عوره

الفاجر اللي لغيره صار تمثالي

ليته درى ماحن بملعب ولا كوره

ليته تريث قبل لا الموت ينهالي

والا تريث وشاف الحق والصوره

الصورة اللي تبين كيف الأبطالي

من يسلم الناس من قبحه ومن شوره

لا يحسب انه بديرة ناس جهالي

يبغى يمشي علينا قصة افجوره

ما ناخذ العلم من رجال دجالي

امورنا من ولاة الأمر مخبوره

يبطي على فعلته ما هوب محتالي

كلٍ يعرف الوطن وشلون معموره

ما بيننا من يدس السم بالحالي

وما بيننا من يخون العهد واموره

وما بيننا من يحلل ذبح رجالي

لو كان ما هو بمسلم للعهد دوره

لا والذي نزل التوبه والأنفالي

الحق لأهل الحقيقة ساطعٍ نوره

تبقين يا ديرة التوحيد بالعالي

بأفعالنا بعد ربي دوم مسروره

تبقين يا اغلى الغوالي منزلك غالي

وتبقين من نظرة الحساد ماجوره