ميعادٍ أتعب له من العيد للعيد

تلغيه يوم أحرى ضما كل عنقود

برد وسلام الغ السفر والمواعيد

مالك من اللي غير ميعادنا فود

أنا بعيد وغالي أحلامي بعيد

له في الرخا طفلٍ وله في الشقاء عود

ماهوب يرضى لي ولا أرضى له زهيد

هواي وأحبابي وخلاني شهود

أشره ويتعب شرهتي جرهد البيد

وأسكت وأنا أكبر من مسافات وحدود

وارهى ويدفعني شموخ المقاصيد

في هامة الهقوه وبالخير موعود

يوم انهزع غصنٍ يبل المجاهيد

تكسّرت بي دونه أغصان وفنود

عطشان لوحولي قراح المواريد

وأضما ولا أرجي من مطر غيرك الجود

وكم فزلي طرفٍ وكم فز لي جيد

وأنا أتهرب ما أصدم الطيب بجحود

ما هو تعالي لا حشا والله شهيد

لا شك ابتعب والعوض فيك مفقود

فقدٍ تركني من عداد المفاقيد

وجرحك يفوح مخضّبٍ ورده العود

وأنا على مبداي لا أبعد ولا أحيد

إلا أن يحول للسهل شامخ الطود

يكفي عزا انّي ما تلمست تمجيد

ولا شهرةٍ مالك من أبعادها زود

وإن جمعتنا ذكرياتك تراديد

هجّجت من صدري لجيش العنا ذود

فهد بن محمد السياري

صفحة الجزيرة الرئيسية

الصفحة الرئيسية

رأي الجزيرة