يا صاحبي خلك على الدين حثاث |
منته على بعض الأمور مغصوبي |
الواجب انك بالدعا تلهث إلهاث |
وعن الخطا لو ما قصدته تتوبي |
وان كان في نفسك من الذنب ماعاث |
الله فتح للعبد باب رحوبي |
باب الكريم اللي للاموات بعاث |
حيٍ ينوب ولا عنه من ينوبي |
خلاق عبدٍ نسله ذكور واناث |
ولامنهم اللي عاش مابه عيوبي |
واللي عن المولى له ابليس لثاث |
ذنب يجاهر به عليه محسوبي |
يغيثنا اللي للمحاويج غياث |
كاشف عن المومن غمام الخطوبي |
من حادرٍ ودقه للآثار دماث |
ينوض برقه في خشوم النصوبي |
نوٍ من المنشا للاشعاب جثاث |
تضيق من سيله كبار الدعوبي |
ياخذ ثمان اوجاب ماكف هثهاث |
لين النوى عن مايكنه يذوبي |
يخرج خزين الارض من جوف الاجداث |
نبت تمريعبه رياح الهبوبي |
تلقى الدبق كنه على درب حراث |
مد النظر ما غار كله عشوبي |
والربل روسه كنها طلع كراث |
مناظر منها الدماث مخضوبي |
طب الكبود اللي غفت عنه الابحاث |
تعكس نواويره شعاع الغروبي |
البر انا جاني على شوفه غلاث |
لولاي عنه من الزمان مغلوبي |
لاروح اغير جو عن جو الاثاث |
واسج به عدة ليالي عزوبي |
قلته وانا أفكاري على ارباع واثلاث |
من وقتنا اللي منه شفت العجوبي |
بعض الليال اهيم من هول الاحداث |
والله يكافينا الفتن والحروبي |
منيف حريبان الشيباني |
|
