يا هجوسٍ وهجها فالضمير متخفي

راح منها اللحم ما باقي الا العضامي

شمسها ما تغيب ونارها ما تطفي

بين جنح النهار وبين جنح الظلامي

محجر العين من كثر الدموع متحفي

من هماليل دمع مثل وبل الغمامي

نصب وسم على نجد العذيه يرفي

ساقه الله عليها بالعدل والتمامي

ما عكست الطريق ولا تبعت المقفي

عن نظام الشريعة ما تغير نظامي

والقنص فالجزيره هو هوايه وشفي

وهدة الطير عقب القرنسه هي غرامي

اليا ذكرت الزمان وسجته ما تكفي

فاول العمر عندي مثل طيف الحلامي

ما تكفي وطير الشوق من فوق كفي

فوق متن الهوا ستل اجناحه وحامي

اشقر فيه كل اوصافنا ماتوفي

ينقص الوصف من دون العديم القطامي

الظهر من يسير الريش كسوه مضفي

والنحر بترة مطلية بالرخامي

وافي الشبر واقطم ساق ملفوف لفي

افجح لا نحدر صلف بتوع همامي

لا نحدر مثل نجم شع نوره وهفي

فالثرى السابعه خفس ابليس الحرامي

وعن هبوب الشمال وبردها ما يدفي

غير نار العرين اللي سنها اشعامي

للبداوه واهلها ودي انقل ملفي

في سنام البلاد اللي عليه الكلامي

عن زحام البلد قلبي عيوف معفي

وكان مريت مرينا مرور الكرامي

اترك الشر واهله لو يوقف بصفي

ما نبي له شراب ولا نبي له طعامي

ريف النشاما

صفحة الجزيرة الرئيسية

الصفحة الرئيسية

رأي الجزيرة