يا الله يا منشي مراديف الامزان
|
يا منزل وبل من المزن صافي
|
يا واحد بامرك تدابير الاكوان
|
يا عالم بالبينه والخوافي
|
احفظ حليف الطيب والجود سلطان
|
عساه دايم طيب وامتعافي
|
اللي ملك من قمة الطيب عنوان
|
ريف الارامل واليتامى الضعافي
|
راع اليمين اللي تعلت بالايمان
|
غيث الفقارى بالسنين العجافي
|
مثل السحاب اللي على الأرض ودان
|
وبل يسيل ممحلات الفيافي
|
كل لأبو خالد مود وشفقان
|
راع الجميل اللي على الناس ضافي
|
سلطان سلطان الكرم راع الاحسان
|
ريف الفقير اللي على الرجل حافي
|
عساه يبطي حي مع طول الازمان
|
لا صار طيب ما علينا اخلافي
|
الله يرده سالماً يم الاوطان
|
ونطيب من طيب الكريم السنافي
|
ونطلب من اللي عالم كل ما كان
|
انه يجيبه سالم ومتشافي
|
يشفيه من عنده شفا كل مرضان
|
الله هو اللي عالم كل خافي
|
متى يجون اخوان نوره علا شان
|
نفرح فرح من شاف غاليه لافي
|
كل على شوف أهل الطيب ولهان
|
لهم الغلا والقدر بيّن وخافي
|
متى يجي سلطان واخوه سلمان
|
والكل منهم طيب ومتعافي
|
بداح بن محسن بن عبود السهلي |
|
