للحزن سلطة في قلوب المحبين
|
لا فارقوا من غير رجعة (حبايب)
|
يطول عمر الضيق بالصدر (ويبين
|
بالوجه) شيء من عطا الوصل غايب
|
أتلمح العبرات وتصرح العين
|
ويقول جرح الهجر مانيب طايب
|
لي كم يوم خاطري ما غدا زين
|
وجه السعة فيني من الضيق هايب
|
عيشني الهجران حال المساكين
|
ويا كيف يزهد بآخر العمر شايب
|
أهج من حزني بضحكي على وين؟!
|
وملح الفرح في بحر الأحزان ذايب
|
ما من خروج يسار والا من يمين
|
هبت علي اشجان عمري هبايب
|
يردني عن موتتي وازع الدين
|
والا الحزن بالصبر ماهوب تايب
|
يا قلب لا تجزع من الصعب والشين
|
ضني بصبرك ما رجع يوم خايب
|
مأجور، درجها عسى ربك يعين
|
هذي هي الدنيا متاع ومصايب
|
فيصل بن سبيل الباهلي |
|
