أبطلب اللي معتلي فالسماوات

وادعي دعاء المجتهد في قيامه

بدعي لجدي وارتجي فالاجابات

الله يغفر له ويرحم عظامه

وبكتب قصيدة واذكر العود فأبيات

ولعل ما يلحق قصيدي ملامة

جيتك يا بوخالد وفي صمتي أصوات

غطت على صوت الزمان وحطامه

جيتك أنا والشعر نقطع مسافات

وما جيت خلفه جيت أنا من أمامه

هز القصيد وتسقط بيدك الأبيات

واجمع لجدي ما يناسب مقامه

وان قلت جدك مات بآقول ما مات

عندي على قولي دليل وعلامه

ما مات من خلّف (رجال المروّات)

عياله اللي سايرين بنظامه

ما مات من كانت حياته صلاوات

حتى بفراش الموت فرضه أقامه

كان بحياته يشبه لضلع أبانات

للقوم شيخ وللمراجل زعامه

أذكر كلامه كان كلّه بالآيات

دايم بذكر الله مملي كلامه

وعاش بحياته ما ملك غير فذّات

لكن ملك نفسه بعزّ وكرامه

وأوقف بلاده للمساكين بالذات

بيضٍ خذت جهده وكل اهتمامه

فالناس فرق وللأوادم مقامات

والعود كان أعلى مقامٍ وهامه

اليا تكلّم أتقنوا فنّ الإنصات

واليا سكت كان بسكوته فخامه

كلٍ يعرفه من زمان الدويلات

اليا زمن حلّت عليه السلامه

وبآخر حياته ودّع العمر بسكات

والله أمر وأحسن لجدي ختامه

تقول جدك مات وآقول ما مات

ما مات غير اللي حياته ندامه

فهد ضيف الله الغيداني

صفحة الجزيرة الرئيسية

الصفحة الرئيسية

رأي الجزيرة