يا سلام الله سلام ما يوصفه الخيال

ما بعد قاله خطيب ولا بعد خطه وزير

مرحباً ترحيبة ترقا على روس الجبال

مزنة منها الغلا والود كون له غدير

مرحباً بك يا المليك اللي تزعمت الرجال

بالوفا والصدق والأقدام والعقل البصير

في ضمير الشعب حبك من قديم ولا يزال

ما تغيره الليالي لو تلف وتستدير

يا ملكنا تاجنا اللي نلبسه فوق العقال

يالقبال اللي على وجهه علامة كل خير

الوطن في ظل عهدك من عدال في عدال

والمواطن في ضميرك ساكن سودة عسير

حاكم بالعدل والميزان ما تعرف ميال

حافظ حق الصغير وحافظ قدر الكبير

سيف بالكف اليمين وغصن بالكف الشمال

من بغى الدرب العسير ومن بغى الدرب اليسير

من بساطة هيبتك تفتح على نفسك مجال

تاصلك شكوى الكبير وتاصلك شكوى الصغير

ومن تواضع هيبتك ما فيك كبر ولا اختيال

ساكن قصر الغناه وساكن بيت الفقير

كامل في كل ميزاتك ولله الكمال

جامع كل الخصال الطيبة مالك نظير

يا ولد من شيد الدولة على حكم العدال

بالعزم والصبر والايمان والراي الشطير

البطل عبدالعزيز اللي حشا ما له مثال

من بعد وقت النبوة وخلفا الهادي البشير

جالها قوم تناحر بين غارات وقتال

مات يحكمها صراط ولا يحكمها ضمير

ما معه يا كود سيف وكلمة المولى تعال

وأربعين كلهم صطوه وشر مستطير

وطب في قصر الرياض وصال في بطنه وجال

وانتمى عبدالعزيز بنخوة الاسم الشهير

واسترد الملك واذن مذن المسجد وقال

الحكم لله ثم للفيصلي ما له خشير

ووحد اطراف الجزيرة من طريف إلى الطول

ومن عمان الى الكويت ومن تهامه للعقير

وقادها عبدالعزيز بكل حكمه واعتدال

دولة دستورها القرآن ما غيره يصير

وعساه بجنة الفردوس في برد وظلال

منزله بأعلى المنازل من كرم رب بصير

سيدي جينا لشوفك والمعايد والسؤال

شوفتك قدامنا نفرح بها والله خبير

عاد عيدك يا ملكنا بالسعد في كل حال

قالها اللي بالولا من عهد جدته يسير

ولو مدحت وقلت مهما قلت ما كفى المقال

قدرك أكبر من كلام المد لو انه كثير

وختمها صلوا على أحمد عد ما هل الخيال

الرسول اللي بعث بالحق للأمة بشير

فراج بن محمد الطنباوي السبيعي

صفحة الجزيرة الرئيسية

الصفحة الرئيسية

رأي الجزيرة