يا تل قلبي تلتين تتالا |
تلة دلو مورد ظمايا نتلها |
احيام وضح قيظت بالشمالا |
ملى الحياض لها عجل ونده لها |
ام الحيور عشرت يا هلالا |
عساك تعرف يوم تضرب فحلها |
انعيم وامنةٍ تبوج السهالا |
والذيب عقب الهيبه استنعج لها |
عند الهمج صار المحرم حلالا |
الخلق كثرت يا مكافي حيلها |
الصدق دون أسباب ظلم يغالا |
بعض الذمم دلت تباع بهللها |
الناس تعرف كل من حط شالا |
يا موقظ الحيه بمحثلك شلها |
يا حيف يا دار القروم الرجالا |
جاها عرم سيل ودمر حللها |
اعتزت البيزه ورخص الريالا |
والثيب ام عيال عافت بعلها |
ادول على دوله بخفيه تمالا |
يا كثر من لا يومن من دولها |
معاد تاثق باليمين الشمالا |
عوى على راس الطويلة ثعلها |
الموت كان الشيل يا شعيل مالا |
الله عن الميل الكريم يعدلها |
الوادي المسني من الوسم سالا |
والسدرة ام الشوك نونا نحلها |
زلت عصور مكرمين السبالا |
وحلت محنية الاظافر بدلها |
بعض العرب لو يلبسون الشيالا |
وتجلس مع النسوان كان احسن لها |
دار بها رقصٍ بدبرة جهالا |
لا تامن ان الله يخسف بأهلها |
لا بعد من بعد النزول ارتحالا |
الى سئلتا كلمة الحق قلها |
اصدع بما تعرف على كل حالا |
لا تلتفت لرضى العلوج وزعلها |
قامت على الناس البلاوي توالا |
من عالمٍ تورطت من جهلها |
نرجي من المعبود جل وتعالا |
مبري علل من لا تعالج عللها |
انه يكافينا ميول الليالا |
وعقايب تنخاف ما نحتملها |
ثقال الحمول لها تدنا الجمالا |
يا نمرها يا ليثها يا جملها |
اوط العدا بالحق وطي النعالا |
اللي يشيل حمولها يبرك لها |
هاك الطيور اللي منول تشالا |
حول لها من قرنس لها واكلها |
اليوم بعض الناس جاهم هبالا |
مدري وش اللي لا بلينا هبلها |
بين الاسد والنمر طال الجدالا |
الله يعين ان كان طول جدلها |
وشلون غبتي يا نجوم تلالا |
والجدي هاك الحين خان بزحلها |
ترى الجداد اليوم غير السمالا |
النار تحرق يا نمر من شعلها |
الى نزلت انزل بروس الطوالا |
وزلات جارك لو يزل احتملها |
بلاد غيرك لو زهت بالجمالا |
خلك بدارٍ كل مسلم دهلها |
ديار أهلها يتعبون الدلالا |
يستاهل الامداح حيٍ نزلها |
والخاتمة يا مدعين الكمالا |
الكامل اللي كل خلقه كفلها |
عبدالله بن صقيه التميمي |
|
