الكلمة اللي تحز النفس ذكراها |
هي علتي هي سبب شكواي وطعوني |
والله لو قالها غيرك فلا ارضاها |
أما تثاريت والا متّ مغبوني |
يا كبرها منك خصّ وبعد مغزاها |
يا فرحة اعداي فيها يوم يدروني |
ما همّهم ساس مصدرها ومنشاها |
تسوقهم نار غلِّ كان مدفوني |
وانا على شانك اسكت واتناساها |
لو أنّها بيّحت سدّي ومكنوني |
لكن مشاعرك من مقدارك ادراها |
لعيونك اجحد جروح القلب وتهوني |
اصبر على سقمها واخفي بقاياها |
تنزف طعوني وقلبي فيك مفتوني |
حتى سهوم المنايا منك محلاها |
يا منتهى غايتي يا قرة عيوني |
أحبّ طبعك وخفّة دمك اهواها |
واعشق سواليفك اللي تبعد حزوني |
واوصاف حسنٍ ملكت احلى مزاياها |
لا صرت حاضر توارى كل مزيوني |
ساجي التويجري |
|
