يا الله بنو بارقه وقت الاغباش |
يكشف سناه وفيه خير ورجاوي |
يعد سيله من مشى فيه طراش |
ما عد فيه شخوط سيله ضفاوي |
غيثه يعل ديار يبست وعطاش |
تحيي رجوعه كل دو خلاوي |
سادس سنه ما شيف بالعين رهاش |
برق الحيا ما لاح وقت الحراوي |
يا الله بغيثٍ يحيي ارتوع الادباش |
يقطع محل وقت الزمان السناوي |
تنبت فياض شوفها يمتع الجاش |
يعلها من رايح الوسم راوي |
لا ربعت ربح النفل ينعش انعاش |
برياضها يسلى الغريب الجلاوي |
الأرض خضراء والزهر كنه أفراش |
نوارها شوق وقصيد الهواوي |
يا ما حلا والليل سوقات وارشاش |
والجود من ربي هبوبه صباوي |
يرتاح بال اللي من الوقت منداش |
راع الولع فيها يسج الخطاوي |
يبعد عن اللي كنه الداب نهاش |
اللي على المقفي يسم الحكاوي |
بالوجه يضحك قلبه ابيض من الشاش |
ولا أقفيت يمطر في سماك البلاوي |
عديم مذهب يصطنع وجه بشاش |
معروف لو كرر عليك الهلاوي |
يا الله دخيلك.. بيّن الوقت غشاش |
طاح القناع وخاب ظن الهقاوي |
عبدالله الطريسي |
|
