هذه مرثية في فقيدنا الغالي الخال بدر بن عبدالله بن علي الملحم -رحمه الله رحمة واسعة وأسكنه فسيح جناته-: |
جانا خبر كبر الجبل ما قويناه |
علم كبير ولا حسبنا حسابه |
من قوته قامت تشتتني اصداه |
ولا عاد أميزوش خطاه وصوابه |
ما غير أردد ليتنا ما سمعناه |
مار القضا ما أحدٍ وقف دون بابه |
واللي كتب رب المخاليق نرضاه |
وما دبر الوالي لعبده رضابه |
والموت حق ولا عن الموت منجاه |
من حل يومه يرتحل في ركابه |
وحنا انفجعنا في عزيزٍ فقدناه |
رجلٍ حثيم وله مقام ومهابه |
بالمرجله والخير والعز مبداه |
الله يعوض في جنانه شبابه |
خالي بدر بالطيب تعرف مزاياه |
ادري وغيري كل طيب درابه |
وقت اللقا تعرف سماحة محياه |
من قابله يا مرحبا يا هلا به |
واليوم راح وباقي طيب ذكراه |
وكل الخصال الطيبه في جنابه |
يا الله يا المعبود تغفر خطاياه |
وعساه في يمناه ياخذ كتابه |
عسى جنان الخلد داره ومثواه |
يا واحدٍ كل الأمل والرجابه |
ويالله تعين ابوه في كل بلواه |
وتحسن عزاه وتجبره في مصابه |
وتجبر عزا امه ياكريم دعيناه |
وتجير عزا اخوانه وكل القرابه |
وصلاة ربي عد نوٍ نثر ماه |
على النبي الهاشمي والصحابه |
أحمد سعود الحمد- الزلفي |
|
