البارحة بالعنا والضيق والحيره |
ليلي سهرته لحالي وأحسب انجومه |
فكرت في واحدٍ ما همت في غيره |
اللي تزول الهموم بلحظة قدومه |
يزيل همي حبيبي شمعة الديره |
شوفه يداوي جروح القلب واهمومه |
بين عليه حبيب الروح تأثيره |
خلا حياتي حياة أحزان مشؤومه |
أشوف غيره ولكن ما انظر لغيره |
ما ظنتي تنوجد بالعالم ارسومه |
ياجيت أوّصف حلاها صرت في حيره |
أوصافها مع جميع الناس معدومه |
وشلون أوّصف حلاها ياالله الخيره |
لوحه تشيل الجمال بفن مرسومه |
يحماه ربي من الحساد ويجيره |
وأطلب بعد ينكتب يومي قبل يومه |
يا زين شكل الحبيب وزين تعبيره |
حتى رموزه بخاف الهرج مفهومه |
انا عليها شفيق وحيل بي غيره |
أغار والله على الغالي من هدومه |
معاه والله بدرب الحب لي سيره |
سيرة محبة عن الحساد مكتومه |
يخطي عليه وترضيني معاذيره |
ما اقدر أبين خطاه ولا أقدر الومه |
أطيع لأمره ولا أعصي تدابيره |
الروح في حكمها لوجار محكومه |
عنده دواء جرحي الخافي وتخديره |
طبيبي اللي أصاب القلب بسهومه |
طبيب قلبي وهو يعرف تقاريره |
ليته يعالج جريحٍ كثرة اهمومه |
شكيت يوم العنا طالت مشاويره |
والقلب صارت همومه فيه مركومه |
يا ليت خلي يغير كل تفكيره |
تجاه روحٍ بحبه دوم ملزومه |
سلامة محارب اللعاق |
|
