والله لو تدخل براسي دقيقه |
لا يشيب راسك من كثر ما افكّر |
في داخلي ثورة عزوف الحقيقه |
عن واقع ٍ عزز مع الضغط سكر |
يذبل شعور ويرشف الأمس ريقه |
واحصد على كل الأحاسيس تشكر |
الجاهل اللي يلعب اليوم (سيقه) |
رغم انها في عصرها شي يذكر |
صرنا نزود ضيقة الصدر ضيقه |
ونسكر أبوابٍ حشا ما تسكر |
وانا من اللي ما يضيّع طريقه |
من يكره المكروه لإنكار منكر |
اللي طموحه فوق محد ٍ يعيقه |
ما يُحتكر لو كل الاحرار تُحكر |
قضبان راسه يستفز الطليقه |
تستاخره فكره.. وفكره تبكر |
ما عكّره شوف الأماني غريقه |
ولا اصطاد في نهر بغيره تعكر |
يرقا سما مهما ضما للعميقه |
فخرٍ.. ولا تحسب لمثله تنكّر |
وكّر على العزة منيشن طريقه |
حتى كفخ من يمّه الشعر وكّر |
سعد مسهوج العلاطي |
|
