قصيدة رثائية في الفقيد الشيخ عبدالعزيز بن جامع أمير الفوج الخامس وشيخ قبيلة الروسان من عتيبة.. |
مرحوم يا عبدالعزيز بن جامع |
شيخ رحل وأحزن عتيبه رحيله |
رمز الوفاء للدين والطيب جامع |
أمير فوج ونافلٍ كل جيله |
راتب خويّه ما طمع فيه طامع |
من عصبته والا من أيا قبيله |
للخير مفتاح وللشر قامع |
شيخ صناديد الرجال تعنيله |
مخلف هقاوي من تهقوى ورامع |
ومن لا يشيل الحمل حمله يشيله |
والله ما الوم اللي عيونه تدامع |
لو جاء يكف الدمع ما فيه حيله |
يالله ياللي للدعاء دوم سامع |
اجعل مقره فالجنان الظليله |
وادعو لأبو خالد بكل الجوامع |
عسى موازين حسناته ثقيله |
عسى الخيال اللي بروقه تلامع |
يمطر على قبره ويسقيه سيله |
ما هيب بدعوة راهبين الصوامع |
دعوة هل الإسلام وأهل الفضيله |
ولو غاب نجمه طالع نجم لامع |
يطلع محل النجم نجم مثيله |
أبناؤه وأحفاده وكل الجوامع |
أهل الكرم وأهل الفعول الجزيله |
وجامع مثل عبدالعزيز بن جامع |
الله يمهل له سنين طويله |
منير بن سويلم العتيبي |
|
