يا قطعة السّكّر وذرّات الاحساس
في نكهتك حسّيت باهلي وناسي
اخفيت كاسي عنك.. نادى لك الكاس
حتى قدرت تصبّني وسط كاسي
طعمك جرى بالدم يا عطر الأنفاس
الغيت خوفي.. حيطتي واحتراسي
وشكلت من عمري حبايب وجلاّس
حتى غديت الهامشي والأساسي
يا قطعة السُكَّر.. ويا قطعة الماس
شفني امل واحلام.. شفني مآسي
يا قطعة السّكَّر أنا مثل هالناس
أحيان الين.. وبعض الاحيان قاسي
من جيت للدنيا وانا رافع الراس
حتى عرفتك وارتفع زود راسي
كل ما تذوب شوي ألمح شبح ياس
معك انتهى خوفي ولا مات باسي
تذوب أكثر يشتعل برق وأعراس
تذوب.. واذكر بعض ما كنت ناسي
تذوب.. تصغر ألمح جيوش واجراس
تذوب تهتز الجبال الرواسي
تذوب.. يذبل حلم.. وتزيد حرَّاس
كل ما تذوب شوي يضعف حماسي
يا قطعة السّكّر ترى الموت الافلاس
ذبتي.. وأنا اللي صرت بعدك أقاسي
ليل الأسى والحزن ما يعرف قياس
بعدك نخيت الصبر واسرجت باسي
يا قطعة السّكّر وذرات الاحساس
من يوم ذبتي جف قلبي وكاسي
"مدارات شعبية"