لا هل الكرم سيرة وفا كلها عز ونبراس
يمشي بها اللي ما تغير عن اليمه مساره
يبذل جهوده في حياته وفعله يرفع الرأس
عشر المزايا فيه والحر تكفيه الاشاره
يصدق بنطق ينطقه للبشر ويداري الناس
وياصل مع ارحامه ويحفظ جميع احقوق جاره
يجازي اهل الطيب والطيب ما له حد واقياس
يعد فعل الطيب بين الرجال اكبر تجاره
وافي بفعله والعهد ما يخونه طيب الساس
وحفظ الأمانة ميزت فيه والشيمه شعاره
لا صوله المحتاج يعطيه ما يرجع بالافلاس
ايقدم اللي يستطيعه على حسب اقتداره
يعرف ظروف الوقت والله عطاه اشعور واحساس
واكبر مزاياه الحيا والادب زود وقاره
رجال واعي والكرم عادته والطيب نوماس
يفرح بضيفه لا لفاه امتعني من دياره
هذي مزايا اهل الكرم والزمن قاسي وحساس
ما قل دل وزبدة الهرج تطلع باختصاره
"مدارات شعبية"